Këshilli Europian mblidhet sot në Luksemburg për të vendosur mbi mbajtjen e konferencës së parë ndërqeveritare me Shëqipërinë dhe Maqedoninë e Veriut. Takimi vjen në një kohë kur nga Bullgaria ende nuk nuk ka hequr dorë nga kundërshtimi i saj për Shkupin, e disa vende tjera nuk kanë dashur që të nisen negociatat vetëm me Tiranën. Vendi më skeptik i BE-së në raport me Shqipërinë, Holanda e dha pak kohë më parë dritën e saj jeshile për bisedimet, duke hequr kështu një pengesë të madhe në rrugën e vendit tonë. Holanda u shpreh e bindur se Shqipëria ka bërë përparim mjaftueshëm aq sa për t`u ulur në tryezë me zyrtaret e BE-së dhe për të celur negociatat e anëtarësimit. Ky qëndrim pozitiv i saj dhe deklaratat optimiste të zyrtarëve të lartë gjermanë, austriakë apo italianë kanë ushqyer shpresat se do të hapet rruga për konferencën ndërqeveritare. Pas mbledhjes së sotme në Luksemburg, pritet të zhvillohen diskutime në Bruksel në datat 24 dhe 25 qershor. Burime diplomatike nga disa shtete të rëndësishmë të BE kanë pohuar më herët se po bëhen “përpjekje maksimale” për të nisur negociatat me Shqipërinë dhe Maqedoninë e Veriut dhe se po synojnë si afat për këtë fundit e muajit qershor, kur edhe skadon presidenca portugeze e BE-së. Në Bruksel thuhet se do të bëhen përpjekje që të ketë rezultate konkrete në mënyrë që të kthehet besimi në procesin e zgjerimit.