Spektatori fierak ka mirëpritur për dy netë me radhë në skenën e Teatrit “Bylis” komedinë “Sonte do darkojmë në shtrat”, me regji të Kiço Londos dhe interpretimin e aktorëve të trupës së Portokallisë. Mes të qeshurave dhe duartrokitjeve, publiku ka shijuar një nga komeditë më të suksesshme të autorit francez Marc Camoletti, i njohur edhe për veprën “Boeing Boeing”. Shfaqja sjell historinë e Bernardit, i cili planifikon një fundjavë perfekte në vilën e tij, ndërsa pret të kalojë kohë me të dashurën, larg bashkëshortes së tij Jacqueline. Por gjithçka del jashtë kontrollit kur edhe Jacqueline ka planet e saj sekrete, pikërisht me mikun e Bernardit, Robertin. Nga ky moment nis një zinxhir situatash komike, keqkuptimesh dhe identitetesh të ngatërruara që mbajnë publikun në të qeshura pa fund.