Prej gati një muaji, Mali i Zi po përballet me një skandal seksual që ka tronditur opinionin publik dhe skenën politike, pas publikimit të disa videove me përmbajtje intime që përfshijnë zyrtarë të lartë shtetërorë. Ngjarja ka sjellë dorëheqje, akuza të ndërsjella dhe nisjen e hetimeve nga autoritetet. Në fillim të vitit u publikuan disa video të një zyrtareje të lartë, në atë kohë sekretare në Ministrinë e të Drejtave të Njeriut dhe Minoriteteve. Pamjet shkaktuan reagime të forta në publik dhe çuan në dorëheqjen e saj. Pas saj, dha dorëheqjen edhe ish-drejtori i Agjencisë Kombëtare të Sigurisë, i cili njëkohësisht mbante edhe funksionin e këshilltarit të sigurisë së presidentit të Malit të Zi. Në videot e publikuara, zyrtarja shfaqet në momente intime me një burrë, për të cilin janë ngritur dyshime se bëhet fjalë për ish-zyrtarin e lartë të sigurisë. Paralelisht, në mediat online janë shpërndarë edhe fotografi private të saj. Ajo njihej për praninë aktive në rrjetet sociale, ku ndante aspekte nga jeta private dhe profesionale, si dhe për deklaratat e saj mbi rolin e grave në politikë. Ajo kishte theksuar shpesh se gratë në jetën publike përballen me presion dhe paragjykim, ndërsa pamja e tyre shpesh interpretohet padrejtësisht si mungesë serioziteti.