Gjermania ka ofruar ridislokim të sistemeve të mbrojtjes ajrore Patriot në vendin anëtarë të NATO-s, Poloni, në nisje të fillimit të vitit të ardhshëm, njoftoi të enjten ministria e Mbrojtjes së Gjermanisë. Në deklaratë thuhej se këto njësi mund të vendosen deri në gjashtë muaj. “Me ketë masë ne mund të mbrojmë një qendër logjistike në Poloni që ka rëndësi të madhe për dërgimin e pajisjeve në Ukrainë”, tha ministri gjerman i Mbrojtjes. Homologu i tij polak tha përmes një postimi në rrjetin X se Varshava e mirëpret vendimin. Gjermania dislokoi 300 trupa dhe tre sisteme Patriot në Poloni, nga fillimi i janarit deri në nëntor të 2023. Ndërkohë, të premten kancelari gjerman Olaf Scholz zhvilloi një bisedë telefonike me Presidentin ukrainas President Volodymyr Zelenskiy, të cilin, siç tha e siguroi se Gjermania do të vazhdojë mbështetjen ushtarake për Ukrainën. Kjo ishte biseda e tyre e parë zyrtare që kurse zoti Scholz bisedoi me Presidentin rus Vladimir Putin, më herët gjatë këtij muaji. Një zëdhënës i qeverisë gjermane tha se biseda kishte qenë “konstruktive” dhe se Prisdenti Zelenskiy e kishte falenderuar qeverinë gjermane për ndihmën ushtarake, veçanërisht atë për mbrojtjen ajrore. Në Ukrainë, një ditë pas sulmeve masive ruse ndaj infrastrukturës energjitike, ekipet po punojnë për riparimin e dëmeve. Më shumë se 1 milionë banorë mbetën pa energji si pasojë e goditjeve me drone dhe raketa nga Rusia ndaj rrjetit elektrik të Ukrainës.