Qeveria ukrainase deklaroi se droni ushtarak që u përplas në një zonë të gjelbër në Zagreb mbrëmjen e së enjtes, nuk është i saj. Ishte ekzekutivi kroat që kërkoi të dinte nëse mjeti pa pilot i përkiste ukrainasve, Këshilltari i ministrit ukrainas të Mbrojtjes, Markijan Lubkjivski, e mohoi këtë teksa fliste për portalin kroat Jutarnji.hr. Pas verifikimeve të mëtejshme, zyrtarët kroatë dolën në përfundimin se objekti që shkaktoi një shpërthim të fuqishëm e tronditi një zonë periferike të kryeqytetit, është një dron ushtarak i prodhimit sovjetik, i cili ka ardhur nga Rumania përmes Hungarisë në hapësirën e Kroacisë. Droni ra në afërsi të konviktit të studentëve "Stjepan Radic", në pjesën jugore të Zagrebit. Fatmirësisht, nuk pati të lënduar ndërsa u dëmtuan disa makina. Sipas presidentit kroat, Zoran Milanovic, mjeti ka fluturuar mbi Kroaci për gati 7 minuta. Ky konsiderohet një incident mjaft serioz dhe po trajtohet si tillë. Ekspertë ushtarakë ndërkohë kanë ngritur pyetjen sesi droni, që e identifikojnë si Tu-141 , ka mundur të kalojë nga Ukraina, përmes Hungarise e deri në Zagreb e ndërkohë nuk është diktuar dot as nga radarët hungareze e nga ata kroatë apo të ndonjë vendi tjetër të NATO-s. Milanovic theksoi megjithatë se droni nuk i drejtohej kundër Kroacise dhe se bëhet fjalë për një incident.