Në zemër të qytetit ku lindi dhe u rrit, u vendos shtatorja e poetit të ndjerë Petrit Ruka. Ceremonia u organizua në sheshin “Lord Bajron” në Tepelenë, ndërsa shtatorja me një vlerë prej 3.5 milionë lekësh, u realizua falë nismës së dy të rinjve tepelenas dhe kontributit të banorëve dhe dashamirësve të artit të Rukës. Miq dhe kolegë të artit dhe letrave ndëruan kujtimin e poetit, që mbeti gjithmonë i lidhur me Tepelenën, peizazhin e lumit Vjosë dhe figurat e njerëzve të thjeshtë, që gjenin gjithmonë vend në vargjet e tij. Për tepelenasit, ky monument është një kujtesë e gjallë për qytetin dhe brezat që do të vijnë, duke e mbajtur të gjallë kujtimin e një prej bijve më të shquar të Tepelenës. Petrit Ruka u nda nga jeta në korrik të vitit 2021 në moshën 67 vjeçare. Ai ishte poet, regjisor, skenarist i filmit artistik, dokumentar e vizatimor por studuesit e veprës së tij besojnë se kontributi që e ka bërë atë unik ishte poezia. Poezitë e tij për Naimin, atdheun, plagët e emigrimit, familjen, prindërit, dashurinë janë vlerësuar mes kulmeve të poezisë dhe identitetit shqiptar.