Sekretari i Përgjithshëm i NATO-s, Mark Rutte, dhe Sekretari i Shtetit i SHBA-së, Marco Rubio, folën me shtypin përpara një takimi me ministrat e jashtëm të vendeve të NATO-s të premten. Zyrtari i lartë amerikan është përpjekur të sigurojë aleatët lidhur me vendimet e SHBA-së për vendosjen e trupave në Evropë. Ndërhyrja e Rubios në fund të një takimi të ministrave të jashtëm të NATO-s në Suedi erdhi pasi Presidenti Donald Trump tha se SHBA-të do të dërgonin 5 000 trupa shtesë në Poloni. Ky vendim erdhi një javë pasi një vendosje e planifikuar prej 4 mijë trupash në vend u anulua dhe disa ditë pas një njoftimi se trupat amerikane do të tërhiqeshin nga Gjermania. Njoftimet kanë shkaktuar konfuzion midis aleatëve të organizatës transatlantike të mbrojtjes. Megjithatë, në një konferencë për shtyp pas takimit të NATO-s të premten, Rubio tha se SHBA-të po rivlerësonin vazhdimisht praninë e trupave të tyre në dritën e angazhimeve të tyre globale. Trump shpesh ka qenë kritik ndaj NATO-s - herë pas here duke kërcënuar të tërheqë SHBA-në nga aleanca për shkak të kontributit të ulët financiar të aleatëve evropianë dhe Kanadasë krahasuar me SHBA-në. Marko Rubio ndërkaq nuk i kurseu kritikat, por tha se “zhgënjimi i presidentit amerikan ishte legjitim pasi disa vende hezituan të kontribuonin në konfliktin e Lindjes së Mesme”, ndërsa saktësoi se kjo çështje do të diskutohet si duhet në samitin e radhës së Natos në Ankara gjatë muajit korrik.