Kryeministri i Sllovakisë, Robert Fico ka bllokuar paketën e re të sanksioneve të BE-së, me arsyetimin se nuk mund ta pranojë në formën aktuale. "Sllovakia nuk do ta mbështesë paketën e 18 të sanksioneve kundër Rusisë, nëse Komisioni i BE-së nuk parashtron një zgjidhje të vërtetë për situatën e krizës, në të cilën ndodhet Sllovakia pas ndërperjes së furnizimeve me gaz, naftë dhe lëndë djegëse bërthamore nga Rusia", shkroi Fico në Facebook. Kancelari gjerman Friedrich Merz vazhdon të shpresojë megjithatë që 27 kryetarët e shteteve dhe të qeverive të vendeve anëtare të BE-së javën e ardhëshme do ta miratojnë paketën e propozuar nga Komisioni i BE-së. "Nëse gjithçka ecën sipas planit, atëherë javën e ardhëshme do të jetë vendosur", tha Merz. Edhe në Uashington po bëhen përgatitje për masa të mundshme të kongresit dhe administratës kundër Rusisë. I pyetur, lidhur me rezistencën e Sllovakisë, ai u përgjigj se komisioni i përfaqësuesve të përhershëm në Bruksel javën e ardhëshme do të negociojë për herë të parë lidhur me paketën e sanksioneve. "Nëse do të jetë e nevojshme ne do të duhet të bisedojmë edhe njëherë në Këshillin Europian. Por ndoshta që javën e ardhëshme do të ketë një marrëveshje." Paketa e fundit e sanksioneve të Komisionit Evropian ndaj Rusisë synon të ulë çmimin e naftës së papërpunuar të transportuar nga deti në 45 dollarë për fuçi dhe shenjestron përdorimin e infrastrukturës së tubacionit të gazit Nord Stream, anijet e flotës në hije dhe bankat. Ajo është aktualisht në proces negociatash nga shtetet e BE-së dhe kërkon miratim unanim.