Presidenti rus Vladimir Putin ka nënshkruar ligjin që ndalon përkthimin në rusisht të fjalës ‘champagne’ -- "Shampanskoe" -- në etiketat e verës së importuar. Eksportuesit francezë në Rusi mund të përdorin atë në gjuhën e tyre, por duhet të shtojnë edhe përkthimin në rusisht "Verë e gazuar" në etiketat e tyre. Prodhuesit francezë Moet Hennessy thanë dje se do të ndalojnë furnizimet me shampanjë në Rusi pas ligjit të ri të nënshkruar nga presidenti Vladimir Putin. Legjislacioni thotë se fjala “shampanjë” në rusisht mund të përdoret vetëm për verërat e prodhuara në Rusi. Leonid Rafailov, drejtori i entit rus të shpërndarjes së pijeve tha se ka marrë letër nga prodhuesit francezë ku i njoftohet vendimi i pezullimit. Por në një deklaratë për mediat kreu i degës ruse të prodhuesve francezë, e quajti masën e pezullimit një masë “të përkohshme”, deri në gjetjen e një zgjidhjeje.