Duke cituar mediat izraelite, shtypi turk pretendon se Rusia e ka informuar shtetin hebre se e di vendndodhjen e presidentit ukrainas Volodymyr Zelensky. Channel 12 në Izrael citon zyrtarë vendas të pohojnë se rusët kanë lënë të kuptohet se nuk duan ta lëndojnë kreun e shtetit të Ukrainës, por preferojnë ta kapin të gjallë e ta arrestojnë. Nga zyrtarët ukrainas nuk ka pasur asnjë koment mbi këtë raport. Të dielën, kryeministri izraelit Naftali Bennett u takua me presidentin rus Vladimir Putin në Moskë dhe kancelarin gjerman Olaf Scholz në Berlin në përpjekje për të ndërmjetësuar një armëpushim në Ukrainë. Një sërë vendesh, duke përfshirë Turqinë, janë shfaqur të gatshme edhe ato të ndihmojnë që t`i jepet fund luftës ruse ndaj vendit fqinj. Edhe presidenti turk Rexhep Tajip Erdogan zhvilloi të djelën një bisedë telefonike me Putin. Agresioni rus në Ukrainën është dënuar ashpër nga komuniteti ndërkombëtar, ndërsa Bashkimi Europian, Britania e Madhe e SHBA-ja mes të tjerësh, kanë vendosur ndaj Moskës edhe një sëre sanksionesh ekonomike gjunjëzuese. Zelensky më heret bëri thirrje për bojkotim global të të gjitha produkteve ruse, përfshirë naftën, duke insistuar që nëse pushtimi vazhdon, perëndimi të vendosë mbi Moskën edhe një paketë të re masash shtrënguese. Pamjet: AFP