Bashkimi Evropian ka rënë dakord që të vlerësojë aplikimin për anëtarësim të Ukrainës, Gjeorgjisë dhe Moldavisë. Komisioni evropian pritet të shqyrtojë të tre kërkesat e ish vendeve sovjetike dhe më pas të publikojë një opinion për secilën prej tyre, duke mbështetur ose refuzuar kërkesën. Këshilli i BE-së më pas mund të miratojë kërkesën e secilit vend me unanimitet. Kjo dritë jeshile do ta kthejë aplikantin zyrtarisht në një vend kandidat të BE-së. Pas kësaj, Komisioni do të dalë me një kornizë për negociatat, e cila gjithashtu duhet të miratohet unanimisht nga 27 vendet anëtare. Duke pasur parasysh mangësitë e tyre në fushën e demokracisë, tre vendeve ka të ngjarë tu kërkohet të fillojnë reformat përpara diskutimeve formale. Pavarësisht vrullit të ri rreth zgjerimit të BE, procesi mbetet i gjatë, i mundimshëm dhe kompleks. Një pranim i shpejtë, siç kërkon Kievi, nuk është tentuar kurrë në historinë e bllokut. Parlamenti Evropian, me një Rezolutë të veçantë, më herët, ka kërkuar statusin e vendit kandidat për Ukrainën, e megjithatë ajo nuk ka fuqi detyruese për vendet anëtare.