Marrëveshja e shumëpritur mes Iranit dhe Shteteve të Bashkuara duket pranë finalizimit, me ndërmjetësimin e Katarit dhe Pakistanit. Pas javësh negociatash të tensionuara, palët kanë arritur një draft që synon uljen e përplasjeve dhe hapjen e një faze të re dialogu. Sipas raportimeve të përditshmes “Al Arabiya”, dokumenti përfshin dhjetë pika kryesore dhe njoftimi zyrtar mund të bëhet gjatë orëve të ardhshme. Pikat kryesore të marrëveshjes përfshijnë, ndër të tjera, një armëpushim të menjëhershëm, liri të garantuar të lundrimit në Ngushticën e Hormuzit dhe heqjen graduale të sanksioneve të SHBA-së. Nuk përmendet energjia bërthamore. Palët angazhohen gjithashtu të ndalojnë operacionet ushtarake dhe tensionin mediatik, si dhe të respektojnë sovranitetin dhe mosndërhyrjen në punët e brendshme të njëra-tjetrës. Në draft përfshihet edhe respektimi i së drejtës ndërkombëtare dhe Kartës së OKB-së. Në planin ekonomik, SHBA pritet të nisë heqjen graduale të sanksioneve, ndërsa Irani kërkon lirimin e fondeve të ngrira dhe zhbllokimin e aseteve të tij. Megjithatë, disa çështje mbeten ende të hapura, sidomos programi bërthamor iranian dhe mënyra e menaxhimit të Ngushticës së Hormuzit në të ardhmen, që pritet të diskutohen në ditët në vijim. Një konfirmim i pjesshëm për një marrëveshje të mundshme gjatë orëve në vijim ka ardhur nga të dyja palët, ndonëse me deklarata shumë të përmbajtura. Sekretari i përgjithshëm i SHBA, Marko Rubio deklaroi se “ka pasur progres domethënës në orët e fundit, por ka ende distancë mes palëve. Ne megjithatë e kemi edhe një plan B”, deklaroi ai. Nga ana tjetër edhe Irani ka lënë të kuptohet se palët janë afër. “negociatat vazhdojnë, por nuk mund të themi me siguri se marrëveshja do të jetë e shpejtë”, deklaroi zëdhënësi i ministrisë së jashtme, Esmael Bagei.