“E bëra pa e menduar shumë gjatë”, thotë Damien Tarel, i riu që përfundoi pushtoi lajmet në mbarë botën pasi qëlloi me shuplakë presidentin francez Emmanuel Macron gjatë një tubimi elektoral. 28 vjecari është në paraburgim që prej ditës së martë dhe ai impuls i momentit, mund t`i kushtojë më shumë nga c`e kishte menduar. Tarel rrezikon të dënohet maksimumi me tre vjet heqje lirie dhe një gjobë prej 45 mijë eurosh. I riu i përshkruar nga miqtë si një njeri i ndrojtur dhe i tërhequr, i tha hetuesve se është simpatizant i lëvizjes së jelekë-verdhëve dhe i ka mbështetur protestat e tyre kundër shefit të Elizesë, por nuk ka asnjë përkatësi partiake. Policia kontrolloi shtëpinë e tij ku zbuloi sic thotë një flamur sovjetik, një kopje të Mein Kampf-it dhe disa videolojra që simulonin situata ushtarake. Shuplaka, që përbënte një shkelje të rëndë sigurie, e errësoi ndjeshëm fillimin e turneut të Macronit në Francë që synon afrimin me publikun pas një viti izolimi prej pandemisë dhe një rënieje të popullaritetit. Presidenti e quajti incidentin një “ngjarje të izoluar”, dhe tha se do të vazhdojë takimet me votuesit, pavarësisht shqetësimeve për sigurinë e tij.