Edhe pse Rusia bombardoi orët e para të mëngjesit të se premtes termocentralin bërthamor të Zaporizhzhisë, i cili la pas viktima dhe shumë të plagosur, presidenti Vladimir Putin sërish flet për negociata dhe bisedime. Ai i ka konfirmuar kancelarit gjerman Olaf Scholz se do të ketë një raund të tretë bisedimesh me palën ukrainase. Raundi i dytë i bisedimeve ditën e enjte nuk shkoi ashtu siç pritej për palën ukrainase pasi palët ranë dakord vetëm për krijimin e një korridori humanitar për civilët në zonat e shkatërruara nga bombardimet , ndërkohë që ata kërkuan dhe armëpushim të menjëhershëm. Por Putin në telefonatën që pati me kancelarin gjerman tha se raundi i tretë i bisedimeve do të mbahet këtë fundjavë, ndërsa ky i fundit thuhet se i ka kërkuar të ndalojë menjëherë çdo sulm ushtarak në Ukrainë. Perëndimi dhe SHBA nga ana tjetër kanë shtuar sanksionet ndaj Rusisë dhe njerëzve të cilët cilësohen rrethi i ngushtë i presidentit rus një përpjekje kjo që synon ta kthejë Putin nga rruga e pushtimit. Ky i fundit kërkoi që të mos ekzagjërohet situata duke vendosur më shumë sanksione ndaj vendit të tij. Putin: Ne nuk kemi synime të këqija kundër fqinjëve tanë. Qeveria jonë “nuk sheh nevojë” që fqinjët të marrin veprime shtesë, të cilat do t`i përkeqësojnë edhe më shumë marrëdhëniet tona. Mendoj se gjithsecili duhet të mendojë si të normalizojmë marrëdhëniet, të bashkëpunojmë normalisht dhe të zhvillojmë marrëdhënie normalisht. Por në një kohë që Putin bënte te tilla deklarata, ministrat e jashtëm të NATO , thanë se aleanca nuk kërkon konflikt, por në çdo rast janë gati të mbrojnë veten. Tashmë trupat ruse llogariten se janë vetëm 25 km larg qendrës së kryeqytetit Kiev dhe 10 km nga qytetet Kharkiv dhe Chernihiv.