Presidenti rus Vladimir Putin priti sot në Moskë liderët e aleancës ushtarake të gjashtë vendeve ish-sovjetike Rusi, Bjellorusi, Armeni, Kazakistan, Kirgizstan e Taxhikistan. Putin quajti zgjerimin e NATOs "një problem i krijuar artificialisht për interesat e politikës së jashtme të SHBA," duke shtuar se NATO është kthyer në instrument të vetëm një vendi. Suedia e Finlanda kanë shprehur dëshirën për të nisur hapat për anëtarësimin në NATO dhe kësaj jave pritet të dorëzojnë aplikimet. Por kjo sipas Putin mund të shkaktojë reagime nga Moska, pasi zgjerimi i infrastrukturës së tyre ushtarake do të konsiderohet si provokim. Në takim presidenti bjellorus Alexander Lukashenko nxiti anëtarët e tjerë të aleancës CSTO të qëndrojnë të bashkuar dhe akuzoi Perëndimin se po përpiqet të zgjasë konfliktin për të dobësuar Rusinë. Në lidhje me sanksionet Lukashenko tha: "Pa një front të bashkuar, Perëndimi do të vijojë të shtojë presionin ndaj të gjithë hapësirës post-sovjetike”.