Top Channel/ Nis numërimi në zgjedhjet historike të Etiopisë Ka nisur numërimi i votave në zgjedhjet e Etiopisë, të cilat u zhvilluan duke përjashtuar rajonin verior Tigray te përfshirë nga konflikti, si dhe disa rajone të tjera të vendit me popullsinë të dytë më të madhe në Afrikë. Rreth 38 milionë njerëz u regjistruan për të votuar por shumë prej tyre duhet të presin deri në shtator, kur pritet të zhvillohen zgjedhjet në rajonet e përjashtuara prej luftës, pasigurisë apo problemeve logjistike. Gjithsesi numërimi ka nisur në vendin gjigand me 110 milionë banorë, teksa rezultatet do të kërkojnë disa ditë për të dalë. Kryeministri Abiy Ahmed i quajti dje zgjedhjet "ditë historike për Etiopinë". "Të gjithë pjesët e shoqërisë kanë hedhur votën e tyre në zgjedhjet e para të lira e të drejta të vendit”, tha 44 vjeçari në rrjetet sociale, te shoqëruara me imazhe të njerëzve duke votuar.