Presidenti rus Vladimir Putin nisi këtë të shtunë në Kremlin bisedimet zyrtare me të dërguarit e posaçëm të SHBA-së, Jared Kushner dhe Steve Witkoff, në përpjekjen më serioze diplomatike deri më tani për t'i dhënë fund luftës më shumë se katërvjeçare në Ukrainë. Videoja e publikuar në media tregon Steve Ëitkoff dhe Jared Kushner duke u përshëndetur nga Putin, ndërsa përpjekjet për t'i dhënë fund luftës në Ukrainë po shtohen. Ky takim vjen vetëm disa orë përpara se dy negociatorët e besuar të Presidentit Donald Trump të zhvillojnë vizitën e tyre të parë historike në Kiev, ku do të priten nga zyrtarët e lartë ukrainas. Si një shenjë e rrallë vullneti të mirë për të garantuar mbarëvajtjen e negociatave të udhëhequra nga Uashingtoni, Rusia dhe Ukraina janë zotuar zyrtarisht të mos sulmojnë kryeqytetet e njëra-tjetrës për një periudhë tre-ditore. Zëdhënësi i Kremlinit, Dmitry Peskov, konfirmoi se komandanti suprem rus ka dhënë urdhër që nga mesnata e së shtunës të ndërpritet çdo sulm ndaj Kievit. Nga ana e tij, Presidenti ukrainas Volodymyr Zelensky njoftoi në rrjetet sociale se Ukraina është gati të përmbahet nga çdo goditje ndaj Moskës nga dita e shtunë deri të hënën. "Presidenti Donald Trump u shpreh optimist përpara mediave duke i cilësuar dhëndrin e tij Kushner dhe Ëitkoff si "dy negociatorë të shkëlqyer" që sjellin një propozim konkret për t'i dhënë fund konfliktit më të rëndë në Evropë që nga Lufta e Dytë Botërore. Trump nuk pranoi të specifikonte nëse plani përfshin lëshime territoriale nga Ukraina, por theksoi se "ka një shans të mirë për të arritur diçka". Udhëtimi i dy të dërguarve vjen pas rritjes së viktimave civile gjatë kësaj vere dhe pason një vizitë sekrete që Drejtori i CIA-s, John Ratcliffe, zhvilloi në Moskë muajin e kaluar.