Kryebashkiaku i Moskës ka urdhëruar dje vaksinime të detyruara për rezidentët e kryeqytetit rus që punojnë në industrinë e shërbimeve, duke cituar një rritje "dramatike" në rastet e infektimit me koronavirus. Njoftimi i kryebashkiakut Sergei Sobyanin, i pari për një qytet madhor të botës, tregon se zyrtarët vendorë të shëndetësisë nuk po arrijnë të vendosin nën kontroll rritjen e rasteve të infektimit. Moska i ka kërkuar vaksinim të detyruar deri më 15 gusht të gjithë punonjësve të industrive të shërbimit, ku përfshihen bare, restorante, hotele, shëndetësia, shitjet me pakice dhe të tjera. "Ne thjesht duhet të bëjmë gjithçka në kohën më të shkurtër të mundshme për të ndaluar infektimet”, tha kryebashkiaku i Moskës, Sergei Sobianin.