Ministri i jashtëm i Tajvanit kishte një porosi të qartë për vendet në Europë dhe pjesë të tjera të botës, të cilat po krijojnë raporte të ngushta ekonomike dhe politike me Kinën. “Duhet të mendoheni dy herë”, tha Joseph Ëu në një intervistë për REF. “Politika juaj e jashtme mund të bëhet e njëanshme nëse mendoni se jeni të varur nga Kina. Pastaj veprimet, sjelljet, politikat tuaja duhet të jenë të kujdesshme, sepse nuk do të donit t'i rrezikonit mundësitë tuaja të biznesit”, u shpreh ai. Shefi i diplomacisë tajvaneze ishte në një turne europian, në vazhdën e fushatës së ishullit që të ofrohet si një alternativë e vogël krahas politikës autoritare të Kinës. I shkëputur nga Kina pas një lufte civile në vitin 1949, Tajvani e konsideron veten si rajon të pavarur demokratik, ndërsa Kina e sheh si provincën e saj të shkëputur. Ëu nuk e minimizoi rrezikun e një lufte të mundshme mes Tajvanit dhe Kinës, ndërsa foli dhe për angazhimet e SHBA-së ndaj ishullit. Anembanë Europës, vende si Franca dhe Gjermania, gjatë viteve të fundit kanë rritur kritikat ndaj Kinës, por megjithatë, ende kanë kujdes që të mos i rrezikojnë lidhjet e tyre ekonomike me Pekinin dhe qasjen në tregjet kineze. Në Ballkan, Mali i Zi dhe Serbia kanë tërhequr në mënyrë të vecantë investime kineze dhe kanë nënshkruar projekte të mëdha në kuadër të projektit global infrastrukturor të Kinës “Brezi dhe Rruga” ndaj të cilit ka pasur kritika për korrupsion dhe dëme mjedisore.