101 emigrantë u shpëtuan në ujërat në veriperëndim të Libisë teksa tentonin te kalonin në Evropë, shumica e të cilëve ishin nga Eritrea. Operacioni u krye nga anija Geo Barents në zonën SAR1 mëngjesin e sotëm dhe pati një konkluzion me fat, përkundër mijëra të mbyturve në këtë korridor. Libia është kthyer në pikën kryesore të tranzitit për emigrantët që i largohen varfërisë e luftës në Afrikë e Lindjen e Mesme, me shpresë për një jetë më të mirë në Evropë. Rrjetet e organizuara te trafikantëve kanë përfituar nga kaosi në Libi për të përfituar nga fluksi i emigrantëve në vendin që kufizohet me gjashtë shtete të tjera të rajonit. Të paktën 192 emigrantë janë mbytur në rrugët detare të trafikut vetëm në 2022, thotë Organizata Ndërkombëtare e Emigracionit. Në vitin 2021, të paktën 32,425 emigrantë janë shpëtuar në det dhe kthyer në Libi, ndërsa të paktën 1,553 supozohet se janë mbytur, sipas agjencisë.