Kryetarja e bashkisë së Los Angeles, Karen Bass, shpalli gjendjen e shtetrrethimit në qendrën e qytetit, ku për disa ditë lëvizja do të kufizohet nga ora 8 e mbrëmjes deri në 6 të mëngjesit. Bass pretendon se e hodhi këtë hap me kërkesë të vetë banorëve, pari mbrëmjen e një dite më parë ishin grabitur 23 dyqane në zonë e janë dëmtuar fasada me grafite. Ajo megjithatë i ka kërkuar presidentit Donald Trump të largojë 4,000 trupat e Gardës Kombëtare e 700 marinsat dhe t'i japë fund bastisjeve të agjencisë federale të emigracionit, me argumentin se po krijojnë tension dhe frikë. "Ka më shumë trupa ushtarake sot në Los Angeles sesa ato të vendosura në Siri dhe Irak", thanë stacionet televizive lokale. Edhe pse Trump pretendon se pa trupat federale Los Angeles do të "digjej", operacionet e kontrollit të protestave deri më tani janë kryer nga policia e Los Angelesit, e mbështetur nga forcat të tjera vendore, ndërsa Garda Kombëtare është pozicionuar përpara ndërtesave publike. Trumpi e ka sulmuar kryebashkiaken Bass si dhe guvernatorin e Kalifornisë Gavin Neësom me pretendimin se kanë dështuar ta menaxhojnë situatën. “Po të mos kisha dërguar trupat në Los Angeles, ai qytet sot do të ishte në flakë,” deklaroi presidenti, duke shtuar se “synon ta clirojë Los Angelesin”, ndërsa insiston që protestat u organizuan nga “rebelë të paguar”.