Aktori Fitim Makashi u përcoll në banesën e fundit një ditë pasi humbi betejën me një sëmundje të rëndë në moshën 82-vjeçare. Familjarë, miq dhe kolegë të shumtë nderuan artistin në homazhet që u mbajtën në Teatrin Kombëtar, ku Fitim Makashi la gjurmë me profesionalizmin, pasionin dhe dashurinë për artin. Sokol Angjeli, aktor - Ishte simbol i heroit për të gjithë rininë e viteve ’70-’80 me rolet e tij. Ishte një portret shumë I bukur në film, shumë burrëror, shpesh e krahasonim me portretin e Bekim Fehmiut. Raimonda Bulku, aktore – Sa bukur ta kujtosh një njeri se sa fisnik ishte, çfarë shpirti të madh kishte. Ashtu siç ishte në rolet e tij, me një zë të ngrohtë në karakteret e tij, ashtu ishte dhe në jetë. Aktori brilant i dhjetëra karaktereve në teatër dhe kinematografi ishte dhe mik me vlera të rralla, kujtojnë kolegët. Vasjan Lami, aktor – Miku im i parë në teatër, deri në fund të jetës ishte artist. Vetëm jepte dashuri. Na ngelën shumë gjera pa bërë. Iku shumë shpejt. Mehdi Malka, aktor - Ishte njeri në kuptimin e plotë të fjalës, një njeri shumë i mirë Mes karaktereve, më identifikuesi ishte roli te “Vdekja e Kalit”, që sipas Angjelit përjetësonte shpirtin guximtar të Makashit.