5 janari i 35 viteve më parë u shndërrua në një moment historik dhe në festë të madhe kur pas 45 vitesh, u interpretua për herë në publik pas 45 vitesh “Lahuta e Malcis”. Autori i veprës, Gjergj Fishta ishte ndër shkrimtarët më të censuruar gjatë diktaturës, veprat e tij ishin rreptësisht të ndaluara. Prof. Asoc. Lili Sula – Pedagode në Departamentin e Letërsisë – Vepra e Fishtës është një rast unikal i censurimit të letërsisë. Ky autor u klasifikua, vepra u ndalua në bibioteka, në tekste mësimore, nuk mund të shkonte më te lexuesi i lirë. Ishte një autor që nuk duhej lexuar për shkak të besimit të vet fetar, veprës së shkruar me gegënishten që binte në kundërshti me rregullat e Kongresit të Drejtshkrimit dhe për shkak të atdhedashurisë që vepra e Fishtës e rrezaton në çdo qelizë të saj. Alda Bardhyli – Ishte një nga autorët e përjashtuar dhe më të goditur nga ideologjia komuniste. Studiuesve të historisë së letërsisë shqipe i mungoi një vepër që ishte një pasuri e madhe gjuhësore nga ana e studimeve për t'u parë dhe vlerësuar në të gjithë rrjedhën e letërsisë që do të vinte më pas. Megjithatë, “Iliada” shqiptare e gjente rrugën te publiku përmes rapsodëve, që këndonin poemat e Fishtës teksa luanin në lahutë, instrumentin e lashtë autokton. Prof. Asoc. Lili Sula – Pedagode në Departamentin e Letërsisë – Mbahet mend shumë më lehtë duke kënduar përmes instrumentit muzikor, është një vepër që burimin e forcës e ka te arti, edhe pse politika e ndalonte, gjente rrugën për t’u shpërndarë. “Lahuta e Malcis” është eposi i shqiptarëve, një poemë epiko-heroike ndërtuar mbi episode të shumta ku veprojnë personazhe historike dhe mitologjike.