Kryeministri i Kosovës Albin Kurti prezatoi ato që i cilëson si katër qëndrimet e tij për ecjen përpara në marrëdhëniet mes Kosovës dhe Serbisë. Kurti u shpreh në një mbledhje të Këshillit të Përgjithshëm të Lëvizjes Vetëvendosje, se për palën kosovare, kërkesa e marrëveshjes përfundimtare, ligjërisht detyruese është ajo “që nuk e ndan njohjen nga Serbia prej vendit në Organizatën e Kombeve të Bashkuara për Kosovën. Si pikë të dytë, ai përmendi një marrëveshje që ka formën dhe përmbajtjen e një pakti ndërkombëtar sipas kërkesave dhe qëllimeve të Konventës të Vjenës për Ligjin mbi Traktatet. “E treta, po bëhen 23 vjet bisedime ndërmjet Kosovës dhe Serbisë, gati gjysma e kësaj periudhe nën ndërmjetësimin apo lehtësimin BE-së. Nuk mund të vazhdojmë pafundësisht, por, duhet ta dijnë që në fillim se dialogu, bisedimet, nuk janë për statusin e Kosovës, por për statusin e marrëdhënieve ndërmjet Kosovës dhe Serbisë që duhet të bazohet në barazi dhe reciprocitet, e për këtë është edhe njohja e ndërsjellë”, u shpreh ai. Kurti theksoi se “pavarësinë nuk e kemi shpallur vitin e kaluar, por para 13 viteve dhe 4 vitet e para pavarësia kishte Piter Faith-in si autoritet sovran, ndërkaq prej 13 vjetësh ka Ahtisarin pjesë të saj, duke shtuar se ky kompromis duhet të kishte një rezolutë të re në Këshillin e Sigurimit të OKB-së, por që nuk ndodhi asnjëherë”.