Të paktën 13 veta kanë humbur jetën në një sulm ndaj një furre buke në Ukrainë në qytetin e Makariv. Sulmi që ndodhi pasditen e së hënës la pas edhe dhjetra të plagosur , thonë autoritet ukrainase. Ndërkohë në rrethinat e Kievit vazhdojnë sulmet e sidomos në Irpin ka bombardime të rënda, ndërsa autoritetet thonë se të paktën 2 mijë veta kanë arritur të largohen. Po ashtu afër kryeqytetit, në fshatin e Hostomel, thuhet se kryetari i këshillit të fshatit është qëlluar për vdekje ndërsa shpërndante buke dhe ilaçe. Ndërkohë në jug qyteti i Mykolaiv, është nën presionin e vazhdueshëm të sulmeve. Ukraina thotë se sulmet e rusëve kanë targetuar zonat e banuara, të cilat janë midis Krimesë së aneksuar nga Rusia dhe Odesës qytetit port në jug. Me qindra mijëra civilë vazhdojnë të jenë të bllokuar në Mariupol, i cili është pa energji dhe ka pak rezerva uji dhe ushqimesh. Një familje që u arratis i tha agjencisë së lajmeve AFP se kishin parë "trupa kudo". Të pasurit nën kontroll Mariupolin do t'i jepte Rusisë një korridor tokësor midis Krimesë dhe rajoneve të Luhanskut dhe Donetskut të mbështetur nga Rusia.