Vendimi i paprecedentë i Presidentit Donald Trump për të bombarduar tre centrale bërthamore iraniane ka thelluar frikën e një konflikti në zgjerim në Lindjen e Mesme. Një mënyrë se si Irani mund të hakmerret, thonë analistët, është të mbyllë ngushticën e Hormuzit, një rrugë tregtare jetësore, përmes së cilës kalon çdo ditë mbi një e pesta e furnizimit botëror me naftë, 20 milionë fuçi dhe pjesa më e madhe e gazit të lëngshëm. Irani në të kaluarën ka kërcënuar të mbyllë ngushticën, gjë që do të kufizonte tregtinë dhe do të ndikonte në çmimet globale të naftës, por kurrë nuk e ka përmbushur kërcënimin. Rreth një e pesta e konsumit total të naftës në botë kalon nëpër ngushticë. Midis fillimit të vitit 2022 deri muajin e kaluar, ka kaluar çdo ditë afërsisht 17.8 milionë deri në 20.8 milionë fuçi naftë të papërpunuar, sipas të dhënave nga firma analitike Vortexa. Mbyllja e ngushticës do t’i krijonte një kosto të drejtpërdrejtë Trumpit, pasi do të shkaktonte një rritje të çmimit të naftës me një efekt inflacionist pothuajse të menjëhershëm në SHBA dhe në të gjithë globin.