Një 25 vjeçar ka mbetur i vrarë nga një shpërthim dinamiti në Elbasan teksa tentonte të vendoste lëndën plasëse në makinën e një 40 vjeçari. Ngjarja është shënuar në orën 4 të mëngjesit të së martës kur 25 vjeçari Kristi Balukja ka tentuar të vendosë lëndë plasëse në makinën e shtetasit Renato Çepe parkuar para shtëpisë së këtij të fundit në lagjen “Shënkoll”. Bomba i ka shpërthyer në duar 25 vjeçarit i cili ka marrë plagë të rënda dhe ka gjetur vdekjen në spital. Policia bën me dije se viktima dhe shenjestra kanë pasur konflikte të mëparshme për motive të dobëta ndërkohë që n jë grup specialistësh të policisë së Elbasanit dhe departamentit të policisë kriminale po hetojnë për rrethanat e mëtejshme nën drejtimin e prokurorisë së Elbasanit. Sipas policisë, Kristi Balukja nuk ka precedentë të mëparshëm kriminalë ndërsa emër i njohur për policinë duket se është Renato Çepa.