Personi i dyshuar që sulmoi gjatë Darkës së Korrespondentëve të Shtëpisë së Bardhë, duke detyruar presidentin Donald Trump të evakuohej, është identifikuar si Cole Tomas Allen. Burri 31-vjeçar nga Kalifornia ka studiuar inxhinieri dhe është i diplomuar në Institutin e Teknologjisë së Kalifornisë. Sipas të dhënave publike, i dyshuari ka punuar si mësues dhe zhvillues i video-lojërave në Kaliforninë Jugore. Dyshohet se ai ishte i ftuar në hotelin “Washington Hilton” ku po zhvillohej ngjarja. I dyshuari ishte i armatosur me një pushkë gjahu, një pistoletë dhe disa thika, dhe ka shkëmbyer zjarr me forcat e rendit kur u ndalua dhe u arrestua. Një foto e publikuar në faqen Truth Social të Trumpit, që duket se tregon momentet pas arrestimit, e paraqet të dyshuarin në tokë me duart pas shpine. Autoritetet thanë se i dyshuari nuk ishte goditur nga plumbat, por u dërgua në spital për kontroll dhe trajtim. Një agjent i plagosur i Shërbimit Sekret gjithashtu u dërgua në spital, tha kryetarja e bashkisë së Washington DC, Muriel Bowser.