Qeveria gjermane ka vendosur të heqë pas më shumë se një viti paralajmërimet për udhëtimet turistike në zonat e rrezikuara nga koronavirusi pas rënies së ndjeshme të infektimeve kudo. Nga e diela vendet e Ballkanit si Kosova, Mali i Zi, Maqedonia e Veriut, Bosnja, Serbia nuk janë më zona më të rrezikuara. „Pas muajsh të gjatë izolimi mund të gëzohemi për pak më shumë normalitet”, tha ministri i Jashtëm gjerman, Heiko Maas. Por kjo nuk është ftesë për pakujdesi, tha Maas. "Udhëtim i arsyeshëm dhe me kujdes, kjo është motoja e verës.” Shqipëria sakaq nuk bën pjesë më në "zonat e rrezikut" të klasifikuara si të tilla nga Gjermania. Kur vjen nga një zonë rreziku nuk të duhet të hysh në karantinë e cila si masë, në parim, ende ekziston për çdo person që hyn nga bota e jashtme në Gjermani, kur paraqet dëshminë e testit negativ, ose se je shëruar nga Covid-19 ose ke një librezë vaksinimi dhe se je vaksinuar me njërën nga vaksinat e licensuara në Bashkimin Evropian: me BioNTech/Pfizer, Moderna, AstraZeneca dhe Johnson & Johnson. Këto të dhëna duhet të përcillen gjatë regjistrimit dixhital të hyrjes në Gjermani. Edhe për familjet do të jetë më e lehtë të udhëtojnë. Në bazë të rregullores së re, të vaksinuar duhet të jenë prindërit, por nuk ka nevojë që të imunizuar edhe fëmijët.