Imazhe që tregojnë trupat e Moskës duke lëvizur pajisje ushtarake drejt kufirit të Rusisë me Finlandën janë përhapur në internet, teksa mbështetja për anëtarësimin në NATO vazhdon të rritet në vendin nordik. Kryeministrja Sanna Marin tha se anëtarësimi i mundshëm do të diskutohej "brenda javëve të ardhshme", pas pushtimit të Ukrainës nga Vladimir Putin. Në një paralajmërim të dukshëm nga ana e Moskës, forcat ruse janë parë duke lëvizur pajisje ushtarake, duke përfshirë sistemet e mbrojtjes bregdetare, në një rrugë drejt Helsinkit. Pamjet janë verifikuar nga Sky News. Zëdhënësi i Kremlinit Dmitry Peskov paralajmëroi të hënën se zgjerimi i NATO-s "nuk do të sillte stabilitet" në Europë. Në Finlandë - shtet që ndan nje kufi prej 1,340 kilometrash me Rusinë - ligjvënësit pritet të mbajnë një debat gjatë kësaj jave, pas publikimit të një raporti të qeverisë për anëtarësimin në NATO. Edhe para pushtimit rus të Ukrainës më 24 shkurt, opinioni publik në Finlandë po zhvendosej drejt mbështetjes së anëtarësimit në NATO. Çdo ofertë për anëtarësim duhet të pranohet nga të 30 anëtarët e NATO-s, një proces që mund të marrë katër muaj deri në një vit për t’u përfunduar.