Marrëdhëniet mes Greqisë dhe Turqisë po shkojnë drejt një përkeqësimi të ri pas një periudhe afrimi që nisi pas tërmetit të vitit 2023 dhe kulmoi me Deklaratën e Athinës. Shkaku i përplasjeve të fundit është vendimi i Ankarasë për të shpallur dy zona të mbrojtura detare në Egje dhe Mesdheun Lindor, përfshirë ujëra pranë ishujve grekë Limnos, Samothraki, Rodos dhe Kastelorizo. Greqia e kundërshtoi vendimin, duke e cilësuar të paligjshëm dhe pa efekt juridik në zonat që, sipas saj, nuk janë nën sovranitetin turk. Në thelb, konflikti lidhet me mosmarrëveshjen e gjatë për kufijtë detarë, të drejtat ekonomike dhe shfrytëzimin e burimeve natyrore në Egje. Athina dyshon se zonat e mbrojtura nuk janë vetëm masa mjedisore, por pjesë e strategjisë turke “Mavi Vatan”-Atdheu Blu, përmes së cilës Ankaraja synon të forcojë pretendimet e saj mbi hapësirat detare dhe të drejtat sovrane në Egje dhe Mesdheun Lindor. Përballë kësaj, Greqia po forcon kapacitetet e saj ushtarake dhe aleancat ndërkombëtare, ndërsa planifikon edhe një sistem të mbrojtjes ajrore të frymëzuar nga “Iron Dome” i Izraelit. Ekspertët vërjenë se në pranverën e vitit 2027, në Greqi do të zhvillohen zgjedhje të reja parlamentare.Sipas tyre sa më shumë që afrohen zgjedhjet, aq më i madh mund të bëhet tundimi për Mitsotakisin që të paraqitet si një patriot i vendosur dhe të ashpërsojë ndjeshëm retorikën ndaj Turqisë.