Anija Ro-Ro “Blue Carrier 2”, e cila ndodhet rreth 4.5 milje detare në veri të Mykonosit, është shkrumbuar. Në bordin e anijes ndodheshin 29 persona, 28 anëtarë ekuipazhi dhe një shofer kamioni. Të gjithë u evakuuan në mënyrë të sigurt, teksa sipas autoriteteve dhe kompanisë, nuk ka persona të lënduar. Zjarri dyshohet se nisi rreth orës 08:57 në një kamion në garazhin numër 4 dhe më pas u përhap në pjesë të tjera të anijes. Ekuipazhi aktivizoi menjëherë sistemet e sigurisë dhe zjarrfikjes, por për shkak të përmasave të flakëve u kërkua ndërhyrja e mjeteve të tjera. “Blue Carrier 2” ishte nisur nga Pireu dhe po udhëtonte drejt Vathit në Samos, kur shpërtheu zjarri. Anija transportonte 166 kamionë dhe 29 automjete. Shkaku i zjarrit mbetet ende nën hetim, ndërsa autoritetet dhe kompanitë e angazhuara po marrin masa edhe për parandalimin e ndotjes detare dhe menaxhimin e sigurt të anijes pas shuarjes së flakëve.