Kryeministrja daneze, Mette Frederiksen, deklaroi sot se “gjëja më e rëndësishme tani është të riarmatosim Evropën.” “Nuk mendoj se kemi shumë kohë. Prandaj [duhet] të riarmatosim Evropën: të shpenzojmë, të shpenzojmë për mbrojtjen dhe parandalimin,” deklaroi ajo. E pyetur për propozimin e Macron-it mbi parandalimin bërthamor, ajo tha: “tani duhet të diskutojmë gjithçka, kështu që të gjitha idetë e mira mbi tryezë duhet të jenë pjesë e diskutimit tonë.” Ndërsa kryeministrja e Letonisë, Evika Siliņa, tha se shpreson për “veprime të shpejta dhe vendime vërtet të qarta” në samitin e sotëm, në mënyrë që blloku të përqendrohet në “forcimin e industrisë sonë ushtarake.” Ajo theksoi se Ukraina duhet të sigurojë paqen “përmes forcës, por pa forcë nuk do të ketë paqe të qëndrueshme,” pasi Rusia do ta përdorte këtë mundësi për t’u “riarmatosur dhe pas disa vitesh … të sulmonte sërish vende të tjera.” Siliņa u pyet gjithashtu për propozimet e Macron-it, duke thënë se nuk janë marrë ende vendime mbi këtë çështje: “ndoshta do të kemi disa diskutime edhe në vendin tonë, sepse është diçka e re … kështu që është ende shumë herët për të dhënë përgjigje të qarta.” Presidenti i Lituanisë, Gitanas Nausėda, ishte një nga liderët e parë evropianë që ndaloi për të biseduar me gazetarët rrugës për në Këshillin Evropian të sotëm. Ai tha se “nuk ka nevojë për shpjegime se sa i rëndësishëm është ky takim,” duke theksuar se “Ukraina po na blen kohë të çmuar çdo ditë, duke paguar me gjakun e saj.” “Do të ishte jashtëzakonisht i papërgjegjshëm ta humbnim këtë kohë dhe të bënim diskutime të gjata pa një rezultat të qartë,” theksoi ai. Nausėda bëri thirrje për një qasje më “fleksibile” ndaj shpenzimeve të mbrojtjes në rregullat e deficitit fiskal dhe për më shumë mbështetje për Ukrainën. Ai theksoi gjithashtu se BE-ja duhet të forcojë krahun lindor për të mbrojtur infrastrukturën kritike nga akte sabotimi, agresioni hibrid dhe forma të tjera të destabilizimit të vendeve kufitare. I pyetur për idenë e Macron-it për zgjerimin e “ombrellës bërthamore” franceze, Nausėda tha se kjo “do të shërbente si një mjet shumë serioz parandalimi kundër Rusisë.” Presidenti lituanez gjithashtu theksoi se BE-ja duhet të marrë vendime sot, pavarësisht kundërshtimeve të mundshme nga Hungaria apo Sllovakia, “sepse përndryshe historia do të na ndëshkojë.” “Po zgjat shumë, paaftësia jonë për të marrë vendime. Dhe tani është koha për të vepruar,” tha ai.