“Unë u ndjeva shumë i frikësuar,” thotë James, për BBC, duke përshkruar një incident në Snapchat që e bëri atë të pyeste veten nëse ishte i sigurt të shkonte në shkollë. Djali australian, 12 vjeç, kishte pasur një mosmarrëveshje me një mik dhe një natë para djali e futi atë në një grup në rrjete sociale me dy adoleshentë më të mëdhenj. Menjëherë, në telefonin e tij filluan të vijnë një varg mesazhesh të dhunshme. “Njëri prej tyre dukej sikur ishte ndoshta 17 vjeç,” thotë ai. “Ai më dërgoi video të tij me një hanxha. Pastaj kishte mesazhe zanore që thoshin se do të më kapnin dhe të më goditnin me thikë.” Djali, që për arsye sigurie BBC e prezanton si James e jo me emrin e tij të vërtetë – hapi Snapchat për herë të parë kur ishte 10 vjeç, pasi një shok klase u tha të gjithëve në grupin e tyre të miqësisë të shkarkonin aplikacionin. Por pasi u tha prindërve të tij për përvojën e tij të bullizmit në internet, ai mbylli llogarinë. Përvoja e tij është një këmbanë paralajmëruese që tregon pse është i nevojshëm ndalimi i propozuar nga qeveria australiane në mediat sociale për fëmijët nën 16 vjeç, thotë nëna e James. Ligjet, të cilat u paraqitën në dhomën e ulët të parlamentit të enjten, u quajtën nga kryeministri Anthony Albanese si “udhëheqëse të botës”. Por ndërsa shumë prindër e kanë duartrokitur masën, disa ekspertë kanë vënë në dyshim nëse fëmijëve duhet t’u ndalohet aksesi në mediat sociale dhe cilat mund të jenë efektet negative të bërjes së kësaj.