Ka nisur në Korçë edicioni i 15-të i kolonisë ndërkombëtare të piktorëve “Ditët e Mios”, një ngjarje që mbledh çdo vit artistë nga vende të ndryshme të botës për të krijuar vepra të frymëzuara nga mjeshtri i peizazhit shqiptar, Vangjush Mio. Këtë vit, 42 piktorë nga Shqipëria, rajoni dhe vende të tjera janë bashkuar në këtë aktivitet për tu frymëzuar nga Korça dhe sjellë krijimet e tyre. "Eksperienca këtu për mua është për herë të parë dhe shoh që Shqipëria është një vend shumë i bukur me një natyrë të mrekullueshme. Kjo eksperiencë për artin dhe kulturën ka një rëndësi shumë të madhe. Dua të pikturoj artistin Vangjush Mio në mënyrën se si e shoh unë atë, pas vizitës tek shtëpia e tij muze." "Unë vij nga Rumania, jam piktor dhe arkitekt po ashtu. Vij për herë të parë në Korccë dhe Shqipëri. Kam takuar këtu njerëz shumë të mirë, Korça qytet shumë i bukur. Bëra disa skica nga vende të ndryshme të qytetit dhe sot do ti hedh në telajo. Do të pikturoj pjesë nga pazari i vjetër dhe rreth e rrotull Korçës." "Jam nga Serbia dhe kam nisur të pikturoj për kohë shumë të gjatë, gjithë jetën time, ndërsa profesionalisht që kur nisa studimet për pikturë. Dje ishim në muzeun e Vangjush Mios dhe atje pashë shumë portrete. Është një artist i mrekullueshëm, ndërsa kam marrë shumë frymëzim prej tij” "Vij nga Kosova. Merrem me pikturë prej dy vitesh. Kam një cikël me të cilin po punoj prej një viti me konceptin Zgjohu me gjelat, zgjohu në mëngjes herët, nise një ditë të mbarë dhe këtë mesazh dua të përcjell, ndaj edhe këtu dua të le një pikturë të tillë” Kolonia e piktorëve “Ditët e Mios” do të zgjasë disa ditë, ndërsa veprat e krijuara do të ekspozohen në përmbyllje të aktivitetit, si një homazh për mjeshtrin e madh Vangjush Mio dhe si një pasqyrë e bashkëpunimit kulturor ndërkombëtar në qytetin e Korçës.