Presidenti amerikan Donald Trump ka njoftuar nisjen e asaj që e cilësoi si “operacionin ekonomik më shkatërrues të ndërmarrë ndonjëherë kundër një vendi”, duke paralajmëruar luftë ekonomike dhe izolim të Iranit në përmasa të paprecedenta. Në një postim në Truth Social, Trump tha se çdo shtet, institucion financiar, kompani, aeroport apo ent qeveritar që i ofron mbështetje Iranit do të përballet me “pasoja të tmerrshme në rrafshin ekonomik”. Ai kërkoi gjithashtu ndërprerjen e kontrabandës së naftës, transfertave financiare dhe përdorimit të kompanive guaskë, duke e krahasuar operacionin me një “D-Day ekonomik”. Trump pretendoi se kapacitetet ushtarake dhe ekonomia iraniane janë dëmtuar rëndë, ndërsa përsëriti se Irani nuk do të ketë kurrë armë bërthamore. Media shtetërore dhe proqeveritare iraniane megjithatë i kanë hedhur poshtë deklaratat e tij, duke i cilësuar si të ekzagjeruara dhe pjesë të një lufte psikologjike. Agjencitë Tasnim dhe Fars argumentojnë se sanksionet e mëparshme amerikane nuk kanë arritur të ndryshojnë linjën e Teheranit. “Dita D ekonomike e Trumpit, do të jetë dështimi politik i radhës, pohoi ministri i jashtëm iranian Abbas Araghchi. Ndërkohë, sipas zyrtarëve amerikanë të cituar nga Axios, SHBA ka krijuar në mënyrë të fshehtë një korridor detar në pjesën jugore të Ngushticës së Hormuzit, përmes të cilit po transportohen rreth 10 milionë fuçi naftë në ditë, afërsisht gjysma e nivelit para luftës. Sipas tyre, rreth 15–20 naftëmbajtëse kalojnë çdo natë nëpër këtë korridor, në një operacion që synon të zbusë ndërprerjen e furnizimeve globale me naftë.