Dy janë kandidatët për pasardhësin e Miroslav Lajçakut në postin të dërguarit të posaçëm të BE-së për dialogun mes Kosovës dhe Serbisë, mes të cilëve Përfaqësuesja e lartë e Bashkimit Europian për politikë të jashtme dhe siguri, Kaja Kallas, do të duhet të vendosë këto ditë. REL mëson se se diplomati nga Danimarka, Peter Sorensen, dhe ish-ministri i Jashtëm i Finlandës, Pekka Haavisto, janë të vetmit kandidatë të cilët janë paraqitur për këtë rol deri të premten e kaluar, kur edhe skadoi afati për dorëzimin e aplikimeve. Në BE nuk japin ndonjë hollësi për këtë dhe vetëm konfirmojnë se “procesi i zgjedhjes është në vazhdim e sipër”. Mandati i përfaqësuesit të lartë Miroslav Lajçak mbetet në fuqi deri në fund të janarit. Zgjedhja e pasardhësit të tij është për momentin në vazhdim e sipër dhe në do të japim njoftime të reja në kohën e duhur. Nëse BE-ja do të kërkonte shmangien e një vakumi atëherë procedura e caktimit të dërguarit të ri të posaçëm për dialogun, do të duhej të përmbyllej para fundit të këtij muaji, kur Lajçakut do t’i përfundojë mandati zyrtarisht. Por, përveç vendimit të përfaqësueses së lartë Kallas, me emërimin e pasardhësit të Lajçakut, duhet të pajtohen edhe vendet anëtare të BE-së. Grupet e punës në Këshillin e BE-së janë duke u marrë aktualisht me këtë cështje. Nëse Kallas do të vendose të ketë në këtë post një person me një peshë më të madhe politike, atëherë sipas REL, përparësi do të kishte ish-ministri i Jashtëm i Finlandës, Pekka Haavisto. Por, në anën tjetër, thonë burimet nëse ajo Kallas dëshiron që vetë të merret më shumë më procesin e dialogut në aspektin politikë, atëherë Sorensen konsiderohet si kandidat më i përshtatshëm, sepse ka shumë vite që punon në strukturat e Shërbimit të Vlerësimi të Jashtëm të BE-së (EEAS) dhe do të angazhohej më shumë në ndërmjetësimin për çështjet teknike në dialog.