Prodhuesit e mëdhenj të naftës, të udhëhequr nga Arabia Saudite, kanë rënë dakord të rrisin prodhimin e naftws pas njoftimit të Bashkimit Evropian për një reduktim të madh të importeve nga rusia. OPEC ka rënë dakord të prodhojw më shumë naftë bruto gjatë dy muajve të ardhshëm. Grupi i eksportuesve të naftës tha se do të rriste furnizimin me 648,000 fuçi në ditë në korrik dhe gusht, 200,000 fuçi në ditë më shumë se sa ishte planifikuar sipas një marrëveshjeje furnizimi me prodhues të tjerë, përfshirë Rusinë, të njohur si OPEC+. Administrata Biden përshëndeti vendimin dhe theksoi rolin e Arabisë Saudite si prodhuesi më i madh i grupit në arritjen e konsensusit. Wall Street Journal raportoi të martën se disa anëtarë të OPEC po shqyrtonin idenë e pezullimit të marrëveshjes së furnizimit të OPEC + për të lejuar vende të tilla si Arabia Saudite dhe Emiratet e Bashkuara Arabe të ndërhyjnë dhe të lehtësojnë një krizë të furnizimit që i shtyu çmimet globale të naftës mbi 120 dollarë për fuçi këtë javë. Financial Times dhe Reuters dhanë raporte të ngjashme. Arabia Saudite kishte hedhur poshtë më parë kërkesat e SHBA për të rritur prodhimin përtej kuotës afatgjatë të rënë dakord me Rusinë dhe prodhues të tjerë jo-OPEC. Por shqetësimet se çmimet e larta mund ta çojnë botën në recesion duket se kanë nxitur një rimendim tw situatws . Nafta e papërpunuar Brent, pikë referimi globale për naftën, arriti në 125 dollarë për fuçi të martën, niveli i saj më i lartë që nga fillimi i marsit. Nafta amerikane arriti pothuajse 120 dollarë për fuçi. Pamjet: AFP