Dy shtetas britanikë dhe një maroken të kapur nga forcat ruse në Ukrainë u dënuan këtë të enjte me vdekje, nga një gjykatë në Republikën Popullore të Donetskut, e cila drehtohet nga rebelët pro-rusë. Aiden Aslin, 28 vjeç, nga Nottinghamshire, Shaun Pinner, 48 vjeç, nga Bedfordshire, dhe një i tretë, shtetasi maroken Saaudun Brahim, dolën para gjykatës nën akuzën se janë mercenarë. Të dy britanikët kanë thënë se po shërbenin për llogari të marinsave ukrainas, që i bën ata ushtarë të cilët duhet të mbrohen nga konventat e Gjenevës për të burgosurit e luftës. Historia e dy shtetasve britanikë është e njohur për mediat ndërkombëtare. Aiden Aslin u transferua në Mykolaiv në Ukrainë në vitin 2018ku dhe iu bashkua marinës ukrainase dhe më pas edhe u martua me një vendase. Që nga kapja e tij, ai është shfaqur në foto dhe video në televizionin rus, në të cilat dukej i mavijosur dhe i enjtur teksa merrej në pyetje. Ndërsa shtetasi tjetër britanik, Shaun Pinner, sipas familjes ishte një ushtar "i respektuar" në Ushtrinë Britanike përpara se të transferohej në Ukrainë katër vjet më parë për të përdorur përvojën e tij të mëparshme me ushtrinë ukrainase. Agjencia e lajmeve Tass thotë se avokati i të pandehurve është shprehur se ata do ta apelojnë dënimin. Rusia besohet se po e përdor procesin në fjalë për të ushtruar presion mbi Mbretërinë e Bashkuar dhe se mund të kërkojë një shkëmbim të burgosurish për ushtarët e saj të dënuar për vrasje dhe krime të tjera lufte gjatë pushtimit rus të Ukrainës. Pamjet: AFP