Prej dekadash, Xhevahir Kolgjini vijon traditën e endjes së qilimave, mbi të cilët krijon art. Veprat e tij janë një medium i gjallë poetik, ku tradita ndërthuret qasjen bashkëkohore, duke i shndërruar motivet shqiptare në metamorfoza vizuale që reflektojnë përvojën njerëzore. Xhevahir Kolgjini, mjeshtër – Fillon si një lloj deluzioni në sensin e kërkimit, përjetimeve, emocioneve, ndjenjave. Nis si një proces viziv, nëse ne mbyllim sytë dhe mendojmë diçka, në fakt ne e shohim atë. Kolgjini prezantoi te publiku shqiptar dy qilime të punuara me tejzgjah që në qendër kanë figurën femërore, frymëzuar nga motive të kulturës lindore dhe perëndimore, në ekspozitën që qëndroi për dy muaj e hapur në Galerinë e Arteve Tiranë. Kolgjini Xhevahir Kolgjini – Unë shoh ndërthurjen e dy kulturave ose një përplasje civilizimesh, të simetrisë e saktësisë së lindjes si koncept dhe të qendrës të figurës njerëzore, edhe ne jemi simetrik. Artisti që ndan jetën mes Kosovës dhe SHBA-së ka ekspozuar disa prej këtyre qilimave në Nju Jork, ku ka tërhequr vëmedjen me teknikën e tij ku e shkuara lidhet me të tashmen. Xhevahir Kolgjini – Besoj se publiku është i interesuar për të parë diçka të veçantë. Këto duken si piktura, por nuk janë piktura. Tentativa për ekzekutime në teknika që njerëzit nuk i shohim shpesh. Imazhi është piktorest, është si një vepër arti, por vjen në mënyrë artizanale. Kombinimi i këtyre të dyjave i bën njerëzit të interesuar. I lindur në Kukës, me një lidhje të thellë me traditat e endjes shqiptare, Kolgjini shtyn kufijtë e artit të fibrave, por thotë se numri i artizanëve është ulur ndjeshëm. Xhevahir Kolgjini – Ka njerëz me pasion që punojnë në mënyrë individuale, ka disa organizata që i ndihmojnë, por jo substancialisht, në pikëpamjen e dizajnimit, konceptit dhe teknikave të ndryshme. Nuk ka një eksplorim serioz për shkak të mungesës së financave të njerëzve që dëshirojnë të merren me këtë punë. Sipas artistit, duhet që artizanët të mbështeten, në mënyrë që kjo traditë të trashëgohet te të rinjtë.