“Gjermania dhe partnerët tanë janë të vendosur të mbrojnë territorin e NATO-s kundër çdo agresioni” u shpreh kancelari Friedrich Merz nga Vilnius, kryeqyteti i Lituanisë. “Rusia kërcënon jo vetëm sigurinë e Ukrainës, por edhe të Evropës dhe zonës Euroatlantike”, theksoi Merz, teksa vuri në dukje se situata në vendet baltike mbetet “shumë e tensionuar”. “Mund të mbështeteni tek ne. Siguria e aleatëve tanë është edhe e jona. Nuk ka pasur kurrë një vendosje më të madhe dhe më të përhershme të ushtarëve gjermanë në Evropën Lindore. Dhe dua t’i them botës këtë: Të dashur lituanezë, mund të mbështeteni te Gjermania”, i tha Merz presidentit lituanez. Të dy udhëheqësit dhe ministrat e mbrojtjes të të dy vendeve do të vizitojnë forcat gjermane të stacionuara në vend. Përafërsisht 4,800 ushtarë gjermanë dhe 200 punonjës civilë janë vendosur gradualisht në Lituani që nga viti 2023 dhe do të qëndrojnë atje të paktën deri në vitin 2027, me qëllim forcimin e krahut lindor të NATO- s dhe pengimin e agresionit të mundshëm rus.