Marrëveshja e pensioneve mes Shqipërisë dhe Italisë, e hyrë në fuqi në korrik 2025, u dha mundësinë mijëra emigrantëve shqiptarë të bashkojnë vitet e punës dhe kontributet e derdhura në të dy vendet. Por për shumë qytetarë, përfitimi i kësaj të drejte u shoqërua me pritje të gjata dhe mungesë informacioni. Disa emigrantë shqiptarë në Itali iu drejtuan Fiks Fare pasi prej muajsh nuk merrnin asnjë përgjigje për kërkesat e tyre për pension. Ata kishin aplikuar menjëherë pas hyrjes në fuqi të marrëveshjes, por dosjet e tyre dukeshin të bllokuara mes institucioneve shqiptare dhe italiane. Pas interesimit të Fiks Fare pranë Institutit të Sigurimeve Shoqërore (ISSH), u bë e ditur se fluksi i lartë i aplikimeve dhe procedurat e verifikimit kishin shkaktuar vonesa. ISSH deklaroi se janë trajtuar mbi 7.500 kërkesa që lidhen me marrëveshjen. Pas ndërhyrjes së emisionit, qytetarët konfirmuan se më në fund morën informacionin dhe përgjigjet e shumëpritura për dosjet e tyre, duke falënderuar Fiks Fare për ndihmën në zhbllokimin e situatës.