Deklarata e bërë prej Vladimir Putinit gjatë takimit me sekretarin e përgjithshëm të Kombeve të Bashkuara, Antonio Guterres në Moskë, do të kishte kaluar thjesht si një tjetër retorikë polemizuese e shefit të Kremlinit për Kosovën, me një jehonë të rrufeshme në media që ndoshta do të fashitej brenda disa ditësh, po të mos ishte për një element të pazakontë, i cili tërhoqi menjëherë vëmendje: ngjyrimi që iu bë asaj nga shtypi serb, e madje nga mediat e konsideruara të afërta me presidentin Aleksandar Vucic. “Putini i harroi serbët dhe Kosovën për shkak të luftës”, shkruante gazeta Blic. “Interesi lakuriq: Putini mbron interesat në Donetsk dhe Luhansk me interesin e tij, pa marrë parasysh pozicionin e Serbisë në Kosovë”, ishte titulli i Kurir. “Festë në Prishtinë, Zagreb dhe Sarajevë për shkak të deklaratës së Putinit”, dhe “Putini e godet Serbinë me thikë pas shpine”, ishin disa prej titujve të tjerë që përcillnin një indinjatë të rrallë ndaj aleatit të madh. A ishte kjo një rastësi? Apo është sinjal i një kthese të madhe?