Kur Kosova mbajti zgjedhjet e parakohshme në 6 tetor, vëmendja ndërkombëtare u mbërthye mbi të. Janë shumë gjërat e mbetura pezull që kërkojnë zgjidhje, e sa më shpejt madje. Zgjedhjet e përpara dy muajve tjetërsuan praktikisht skenën politike të vendit, me një ngadhnjim të opozitës mbi ato që konsiderohen si “partitë e luftës”, të cilat i mbajtën mes tyre frerët e pushtetit për një dekadë. Vota e kosovarëve qe një ndëshkim për partitë në pushtet, por triumfi i krahut tjetër vjen me përgjegjësi. Opozita e deriatëhershme, e shpërblyer me besimin e kosovarëve që dolën të votonin në shifra rekord, duhet të japë rezultate, që të mos prodhojë zhgënjim.”Ajo që ndodhi këtu sot, ishte një ndërhyrje e popullit në skenën politike për të parandaluar dramën e një fundi tragjik të shtetit tone”, pat thënë pas fitores Albin Kurti. E ndërsa një fund i tillë, sic e shihte ai, u arrit të shmangej me fitoren e Vetëvendosjes, kosovarët që prej atëherë janë përballur me një tjetër lloj drame: atë të vakumit qeverisës dhe të gjithë pështjellimit që kjo gjeneron.