Në 6 tetor, kur Samuel Paty, një mësues mjaft popullor historie dhe gjeografie në një shkollë të një lagje shumë të qetë të Parisit I tregoi nxënësve në klasë një kopje të karikaturave të profetit Muhamed që kishte provokuar sulmin ndaj redaksisë së revistës satirike Charlie Hebdo pesë vjet më parë, ai padyshim nuk kishte as idenë më të vogël të pasojave tragjike që ky veprim do të kishte mbi vetë jetën e tij, shoqërinë franceze apo marrëdhëniet e Francës me botën islame. Ai që duhet të kishte qenë një eksplorim i lirisë së mendimit në një klasë të vogël me një grup nxënësish, u shndërrua në shkëndijën e një përplasjeje civilizimesh. 10 ditë më vonë, mësuesi 47 vjecar u vra brutalisht nga nje adoleshent me origjine cecene. Një ekzekutim makabër, që tronditi Francën e mbarë botën perëndimore, dhe e nxiti Emmanuel Macron të deklarojë me forcë se nuk do të dorëzohen përpara terrorizmit, e se karikaturat do të vazhdojnë. Po ku është vija e kuqe që asnjëra palë nuk duhet të kalojë? Franca e sheh veten si bastion të lirisë së fjalës, por presidenti i saj sot akuzohet për islamofobi.