Edhe këtë fundjavë pushuesit kanë vërshuar drejt plazheve të Adriatikut, ku kujdesi për veten dhe protokollet anti-covid-19 po sfidohen hapur. Me temperaturat e larta, pritshmëria për “plazh ndryshe” për shkak të kushteve që dikton pandemia është harruar. Distancat janë ngushtuar në rërë dhe në det. Në mjaft raste, subjektet kanë ngushtuar edhe hapësirat nga çadra në çadër dhe nuk respektojnë distancën prej të paktën 3.5 metrash mes tyre. Distanca është lënë mënjanë dhe nga vetë pushuesit. Qëndrojnë të grumbulluar në çadra dhe në det, ndërsa rastet e infektuara me Sars-Cov-2 vazhdojnë të shtohen ndjeshëm në vend.