Një qeveri teknike me përfaqësues të të gjitha partive politike parlamentare, po konsiderohet si opsion i mundshëm për K Kosovën. Dështimi në krijimin e ekzekutivit, kur kanë kaluar më shumë se tre muaj nga zgjedhjet e parakohshme në vend, për analistët po dëshmon se mund të ketë një skenar të tillë, për të evituar krizën institucionale. Politologu Behlul Beqaj, thotë për Kosova Press: “Qeveria teknike është një ide e imja e kamotshme se shoh shumë diversitet në kuadër të subjekteve politike. Në anën tjetër kemi nevojë të jashtëzakonshme për ndryshime kushtetuese dhe të sistemit zgjedhor. Por po më duket sa është ajo e nevojshme është e madhe edhe rezistenca e atyre që e shohin si rrezik për veti këtë”. Ndërsa për analistin Rasim Aliaj, ka mundësi bashkëpunimi mes partive politike por një qeveri e tillë, teknike, duhet të ketë mandat një vjeçar. “Ka skenarë të tillë, nëse jo zgjedhjet e rejat të parakohshme mund të jetë një qeveri teknike. E cila do të ishte me një mandat njëvjeçar dhe jo dyvjeçar, e cila do të çonte tutje edhe procesin e buxhetit. Mirëpo edhe proceset tjera të rëndësishme”. Por, përfaqësues të LDK dhe VV kanë opinione të kundërta. Avdullah Hoti, nga LDK, thotë: “Nuk ka nevojë, nuk e shoh të nevojshme. Duhet të gjendet formula sa më parë edhe vullneti sa më parë që të themelohet institucionet e reja”. Nga lëvizja vetëvendosje, thonë se populli i Kosovës nuk është shprehur për një qeveri teknike. Ata kanë treguar më 6 tetor se duan ndryshim, ndaj edhe votuan lëvizjen për të drejtuar qeverinë e ardhshme. Që nga mandatimi i Kurtit, nga presidenti Thaçi, lideri i vetëvendosjes ka 15 ditë kohë për krijimin e qeverisë. Kanë mbetur tani edhe 13 ditë për të siguruar një marrëveshje me LDK, por nuk shihet ende asnjë sinjal për përafrim qëndrimesh. Në rast dështimi, LDK dhe VV kanë thënë se nuk do të kërkojnë koalicione me partitë e tjera por do ta çojnë Kosovën në zgjedhje të reja.