Anëtarët e Lidhjes Social Demokrate në Maqedoninë e Veriut kanë miratuar dorëheqjen e Zoran Zaevit nga drejtimi i partisë. Shumica e anëtarëve nuk ishin dakord me vendimin e marrë prej tij e më pas bërë publik më 31 tetor. Ata i kishin kërkuar tërheqjen e dorëheqjes, por sipas Zaevit ishte e parevokueshme, kjo pas disfatës së pësuar në zgjedhjet lokale. Zoran Zaev nuk do ta gëzojë më postin e kryetarit të partisë, ku tashmë kanë nisur dhe procedurat për zëvendësimin e tij. Të gjithë ata anëtarë të cilët plotësojnë kushtet sipas statutit të partisë mund të kandidojnë. Zgjedhjet do të mbahen më 12 dhjetor, ku përveç kryetarit do të zgjidhen dhe organet drejtuese të partisë. Procedura do të zgjasë 7 ditë. Zëdhënësja e LSDM-së tha se nga dita e shtunë fillon procedura për organizimin e zgjedhjeve brendapartiake, në të cilat do mund të kandidojë kushdo që i plotëson kushtet e parapara në statutin e partisë.