Në bordin e një trageti italian të linjës Greqi-itali, ka shpërthyer zjarri. Sipas mediave italiane, nuk janë sinjalizuar viktima por policia portuale greke thotë se kapiteni i Euroferry Olimpia i ka kërkuar pasagjerëve të braktisin anijen. Në bordin e tragetit të nisur nga porti grek i Igumenicës dhe të drejtuar për në Brindizi, kishte 237 pasagjerë dhe 51 pjesëtarë të ekuipazhit. Incidenti ka ndodhur pranë brigjeve të ishullit grek të Korfuzit, mes Greqisë dhe Shqipërisë. Në vendngjarje, autoritetet greke kanë dërguar tre motovedeta dhe tre rimorkiatorë. Ende nuk janë bërë të njohura ndërkohë shkaqet e incidentit. Zjarri ka shpërthyer rreth 9 milje larg bregut në zonën greke të kërkim-shpëtimit. Me sa duket, zjarri ka nisur nga një prej ambjenteve të tragetit që mbante kamionët dhe shoferët e tyre. ekuipazhi fillimisht ka tentuar të shuajë zjarrin me mjetet në bord, por kur nuk kanë mundur të bëjnë asgjë, kapiteni ka dhënë urdhërin e evakuimit. 288 personat në bord janë ngjitur të gjithë në bordin e barkave të shpëtimit dhe janë pritur më pas nga mjetet greke dhe italiane. Mediat greke shkruan më herët se 11 persona konsideroheshin të zhdukur, por ato italiane konfirmojnë se të gjithë pasagjerët dhe pjesëtarët e ekuipazhit janë shpëtuar e madje presidenti italian, Sergio Mattarela ka përgëzuar guardia di financan për reagimin e shpejtë në shpëtim të pasagjerëve.