Ambasadorja e Shteteve të Bashkuara të Amerikës në Tiranë, Yuri Kim, vizitoi këtë të martë në Inspektoriatin e Lartë të Drejtësisë. Gjatë kësaj vizite, Kim u takua me kreun e këtij institucioni, Artur Metani. Ka qenë vetë Ambasada e SHBA, ajo që ka bërë publik lajmin, teksa në një postim në rrjetet sociale shkruan: “Ambasadorja e SHBA Yuri Kim u takua sot me Inspektorin e Lartë të Drejtësisë, Artur Metani, i cili drejton një nga institucionet kyçe të reformës në drejtësi. Roli i ILD-së në mbikëqyrjen e disiplinës së gjyqtarëve, prokurorëve dhe anëtarëve të këshillave është thelbësisht kritik për sistemin e drejtësisë në Shqipëri. SHBA do të vazhdojë të ndihmojë në forcimin e institucioneve të drejtësisë në Shqipëri, siç është ILD, ndërsa ato forcohen për të çuar më tej përpara integrimin e Shqipërisë në BE.” Shtetet e Bashkuara të Amerikës janë një nga vendet me më shumë kontribut për Reformën në Drejtësi, teksa vetë Kim herë pas here ka bërë thirrje për të patur rezultate nga kjo reformë.